Eiður Smári farinn að hlaupa | Mætti á æfingu AEK í dag

Stuðningsmannasíða AEK Aþenu sagði frá því í kvöld að Eiður Smári Guðjohnsen hafi mætt á æfingu liðsins í dag en þetta var fyrsta æfing íslenska landsliðsmannsins síðan að hann tvífótbrotnaði í leik á móti Olympiakos 10. október síðastliðinn.

Eiður Smári var þó ekki með á sjálfri æfingunni en hljóp og gekk til skiptis meðan félagar hans tóku á því inn á vellinum. Þessar fréttir benda til þess að endurhæfingin gangi vel þó að enn sé dágóður tími í að Eiður Smári geti farið að spila með AEK á nýjan leik.

Eiður Smári fékk grænt ljós frá læknum félagsins að fara að reyna meira á fótinn en hann fór í myndatöku í síðustu viku þar sem var kannað hvort brotin væru ekki að fullu gróin.

Eiður Smári hefur alltaf talað um það sjálfur að hann ætlaði að spila aftur með AEK á þessu tímabili en forráðamenn félagsins segjast ekki ætla að pressa á hann að koma of snemma til baka. Það er samt líklegt ef marka má þessar fréttir að Eiður geti klæðst gulu treyjunni áður en tímabilið er úti.