Hættulegustu gatnamótin í borginni

Á árunum 2008-2011 urðu nítján umferðarslys á gatnamótum Miklubrautar og Grensásvegar og átján á gatnamótum Bústaðavegar og Reykjanesbrautar. Að sögn lögreglu skera þessir staðir sig eilítið úr en tvö önnur gatnamót á Miklubraut koma líka við sögu ef skoðaðar eru tölur um umferðarslys á höfuðborgarsvæðinu.

„Á sama tímabili urðu fjórtán umferðarslys á gatnamótum Miklubrautar og Kringlumýrarbrautar og sömuleiðis á gatnamótum Miklubrautar og Háaleitisbrautar. Í 5-6 sæti á listanum yfir hættulegustu gatnamótin á höfuðborgarsvæðinu eru gatnamót Sæbrautar og Kringlumýrarbrautar og gatnamót Stekkjarbakka, Skógarsels og Breiðholtsbrautar en á þeim báðum urðu tólf umferðarslys á árunum 2008-2011," segir í tilkynningu frá lögreglu.

„Þegar horft er á hættulegustu vegarkaflana á höfuðborgarsvæðinu koma bæði Garðabær og Kópavogur við sögu. Á Reykjanesbraut, á milli Vífilsstaðavegar og Urriðaholtsbrautar, urðu ellefu umferðarslys á fyrrnefndu tímabili og tíu á Hafnarfjarðarvegi, milli aðreinar að Digranesvegi að frárein frá Fífuhvammsvegi."

Lögregla segir ofangreinda staði væntanlega koma fæstum á óvart, „enda mjög mikil umferð um þá alla og þúsundir ökutækja sem þar fara um á hverjum sólarhring. Þetta eru jafnframt svokallaðir svartblettir en lögreglan fylgist sérstaklega með umferð á fjölförnum gatnamótum og stofnbrautum á álagstímum enda er sýnileg löggæsla eitt af markmiðum lögreglunnar á höfuðborgarsvæðinu. Þá er í samstarfi vegagerðar, sveitarfélaga og lögreglu leitast við að greina orsök óhappa á þessum stöðum og leita lausna."