Leik AEK tvívegis frestað | Á leið í fjórðu deildina?

Fresta þurfti viðureign AEK Aþenu gegn OFI frá Krít í efstu deild gríska boltans í tvígang um helgina. Prentun miða fyrir leikinn, sem fram átti að fara í Aþenu, var ekki heimiluð vegna fjárhagsvandræða félagsins.

Í frétt Reuters-fréttastofunnar segir að orðrómur sé á kreiki að forsvarsmenn AEK velti fyrir sér að sækja um nýja kennitölu fyrir félagið og byrja upp á nýtt, í fjórðu deild. Forseti stuðningsmannafélags AEK, Makis Kasnakidis, segir orðróminn tómt kjaftæði.

„Sem forseti stuðningsmannafélagsins get ég sagt ykkur að enginn er að velta þessu fyrir sér og sem stjórnarmaður í félaginu get ég fullvissað ykkur um að þetta hefur ekki verið rætt, ekki einu sinni í gríni," sagði Kasnakidis við gríska útvarpsstöð.

AEK hefur glímt við fjárhagserfiðleika undanfarna mánuði og leitar logandi ljósi að fjárfestum. Forsvarsmenn félagsins hafa verið boðaðir á fund hjá Evrópska knattspyrnusambandinu, UEFA, á fimmtudaginn þar sem málið verður tekið fyrir. Talið er að AEK þurfi að afla fjögurra milljóna evra fyrir fimmtudaginn eða sem nemur um 650 milljónum íslenskra króna til þess að forðast refsingu.

Gríska félagið PAOK slapp naumlega við alvarlega refsingu hjá UEFA í síðasta mánuði. Félagið, sem er stórskuldugt líkt og AEK, tókst á síðustu stundu að afla fjár sem varð til þess að UEFA sektaði félagið og gaf því frest til 30. júní til að finna lausn á málum sínum. Takist það ekki verður félaginu meinað að spila í Evrópukeppnum næstu þrjú árin og sektað frekar.

Óvíst er hvenær viðureign AEK og OFI fer fram. Öllum leikjum sem fara áttu fram um næstu helgi hefur verið frestað af deildinni í mótmælaskyni við ný íþróttalög í landinu.

Íslendingarnir Eiður Smári Guðjohnsen og Elfar Freyr Helgason eru á mála hjá AEK. Þá er Arnar Grétarsson yfirmaður knattspyrnumála hjá félaginu. Liðið situr í fjórða sæti deildarinnar að loknum 21 leik, fimmtán stigum á eftir Olympiakos sem er í efsta sæti.