Þolinmæðin gagnvart leiðtogum Grikklands á þrotum

Grísk stjórnvöld eru farin að reyna mjög á þolinmæði annarra leiðtoga ríkja á evrusvæðinu.

Stjórnarflokkarnir í Grikklandi hafa enn ekki náð samkomulagi um að gangsetja þær sparnaðar og hagræðingaraðgerðir sem eru nauðsynlegar til þess að landið fái nýtt neyðarlán frá Alþjóðagjaldeyrissjóðnum og Evrópusambandinu. Bæði forsætisráðherra Grikklands og fjármálaráðherrann settu sér tímatakmörk til að ljúka málinu. Hvorug þeirra héldu. Viðræður halda áfram í dag.

Aðgerðirnar sem Grikkir þurfa að grípa til eru m.a. niðurskurður á fjölda opinberra starfsmanna og launum þeirra, hækkun á ellilífeyrisaldri og endurbætur á skattakerfi landsins.

Á sameiginlegum blaðamannafundi þeirra Angelu Merkel kanslara Þýskalands og Nicolas Sarkozy Frakklandsforseta í gærdag kom fram að tíminn væri að renna út fyrir Grikki. Raunar skilur Merkel ekki afhverju Grikkir eru ekki þegar búnir að ganga frá sínum málum.