Birkir samdi við Standard Liege

Birkir Bjarnason hefur gengið frá þriggja og hálfs árs samningi við belgíska úrvalsdeildarfélagið Standard Liege og hefur æfingar strax á morgun. Þetta staðfesti hann við Vísi í dag.

„Þetta hefur tekið langan tíma en ég er ánægður núna og hlakka til að fá að byrja," sagði Birkir sem hefur verið án félags síðan samningur hans við Viking í Noregi rann út. Mörg lið höfðu áhuga á honum en hann ákvað að velja Standard Liege.

„Ég fann að þeir höfðu mikinn áhuga á að fá mig, bæði þjálfarar og aðrir hjá klúbbnum. Það er það mikilvægasta. Þeir hafa ákveðnar hugmyndir um hvaða hlutverki ég eigi að gegna og hvar ég eigi að spila. Ég er því vongóður um að vinna mér fljótt sæti í liðinu," bætti hann við.

„Þetta er skref upp á við fyrir mig og mér líst mjög vel á þetta félag. Það er með frábært æfingasvæði og mjög góðan völl."

Þess má geta að Ásgeir Sigurvinsson lék á sínum tíma með Standard Liege og því fær Birkir að fylgja í hans fótspor nú.