Formaður Vítisengla í gæsluvarðhaldi

Formaður Vítisengla, Einar Marteinsson, var handtekinn í dag og úrskurðaður í gæsluvarðhald í tengslum við alvarlega líkamsárás á unga konu. Fimm vítisenglar eru nú í einangrun vegna málsins.

Ráðist var á konuna í heimahúsi á Völlunum í Hafnarfirði aðfararnótt 22. desember og gengið í skrokk á henni þannig hún var flutt alvarlega slösuð á slysadeild.

Samkvæmt heimildum fréttastofu er konan á þrítugsaldri en hún mun hafa verið meðvitundarlaus þegar að henni var komið. Meðal annars munu mennirnir hafa reynt að taka af henni fingur með einhvers konar klippum.

Par var handtekið skömmu eftir árásina en þriðji maðurinn mun hafa verið með andlitið hulið en hann náðist einhverjum dögum síðar. Þá mun hafa verið ráðist á konuna aftur á milli jóla og nýárs.

Fjórði maðurinn var síðan handtekinn í tengslum við árásina en í dag var formaður Vítisengla færður í járn og úrskurðaður í gæsluvarðhald.

Alls eru því nú 4 karlmenn og ein kona í einangrun vegna málsins.

Fréttastofu er ekki kunnugt um tilefni árásarinnar. Talið er að formaður Vítisengla á Íslandi hafi fyrirskipað árásina á konuna.