Mánudagar eru ekki verstu dagar vikunnar

Fólk stendur almennt í þeirri trú að því sé sérstaklega illa við mánudaga og það séu verstu dagar vikunnar. Vísindamenn hafa nú sýnt fram á að þessi almenna sannfæring er röng. Fólki er í raun jafnilla við alla aðra vikudaga að föstudögum undanskildum.

Bandarískir vísindamenn rannsökuðu skoðanakönnun sem 340 þúsund manns tóku þátt í og komust að því að fólk var venjulega ekki í verra skapi á mánudögum en aðra daga. Fólk var aftur á móti óvenjulega ánægt á föstudögum, enda helgarfríið í nánd.

„Við ályktum að þessi alþjóðlega skoðun manna, að mánudagar séu verstir, sé röng og hana beri að forðast," sagði einn vísindamannanna í samtali við fréttamiðilinn BBC.