Android skilur núna íslensku

Google tilkynnti í morgun ný tungumál sem bætast inn í Android Voice search. Meðal þeirra er nú íslenska, sem þýðir að farsímanotendur sem eiga síma með Android kerfi geta nú talað íslensku við símana sína.

Frá þessu er greint á tækniblogginu simon.is. Vefstjórar þar prufukeyrðu tæknina sem virkar lygilega vel að þeirra sögn. Þeir prufuðu setningar eins og „Gönguleiðir á Fimmvörðuhálsi" „kenningar í nútíma bókmenntafræði" og „Þöngulhausar í íslenskri kvikmyndasögu". Síminn greindi í öllum tilvikum orðin rétt.

Tæknin felur í sér að notendur geta sagt eitthvað við símann sem þá leitar að viðkomandi fyrirbæri á google. Íslenskir Android eigendur hafa með þessari viðbót eignast ómetanlegan félaga, því ekkert er dýrmætara en vinur sem skilur mann.