Grunaður um að hafa myrt April Jones

Breti á fimmtugsaldri hefur verið handtekinn grunaður um morðið á hinni fimm ára gömlu April Jones sem leitað hefur verið að í Wales frá því á mánudag.

Maðurinn, sem heitir Mark Bridger og er fjörutíu og sex ára, var handtekinn á þriðjudag vegna gruns um aðild að brotthvarfi stúlkunnar. Og í morgun gaf lögreglan það út að hann sé grunaður um að hafa myrt stúlkuna.

April var numin á brott á mánudagskvöld þegar hún var að leik vinum sínum við heimili sitt í Wales. Lögreglan hefur stuðst við framburð vitna sem segjast hafa séð hana fara upp í bifreið.

Málið þykir afar óhugnalegt og hafa breskir fjölmiðlar fylgst grannt með gangi mála. Í tilkynningu lögreglu frá því í morgun segir ekki sé vitað hvar April sé niðurkomin og nú sé allt kapp lagt á að finna hana.

Fréttastofan Sky News segir að ljóst sé að lögreglan er að leita að líki hennar þar sem litlar líkur séu á að hún finnist á lífi þar sem hún þjáist af heilalömun og þarf nauðsynlega á lyfjum að halda.

Leit hefur staðið yfir alla vikuna og hafa hundruð lögreglu- og björgunarsveitarmanna, auk sjálfboðaliða, leitað að stúlkunni.