Tilbúinn að draga Frakkland út úr Schengen samstarfinu

Forseti Frakklands, Nicolas Sarkozy, hótar að draga Frakkland út úr Schengen samstarfinu ef Evrópusambandið herðir ekki á eftirliti sínu með ólöglegum innflytjendum.

Þetta er nýjasta útspil Sarkozy í kosningabaráttunni til forseta landsins og er í svipuðum anda og þegar hann sagði á dögunum að það væru allt of margir útlendingar í Frakklandi; kerfið gæti ekki sinnt þessum hópi sem skyldi.

Raunar hefur Sarkozy lengi daðrað við þjóðernishyggju af þessu tagi, þó sjálfur sé hann af innflytjendaættum. Í kosningabaráttunni árið 2007 talaði hann harkalega gegn innflytjendum og uppskar sigur í kosningunum. Hann fór einnig harkalega gegn rómafólki, eða sígaunum árið 2010, og var gagnrýndur harðlega fyrir.

Gangi Frakkland úr Schengen samstarfinu yrði það meiriháttar áfall fyrir Evrópusambandið. Andstæðingi Sarkozy, Francois Hollande, er spáð sigri í forsetakosningunum.

Gengið verður til kosninga í fyrstu umferð 22. apríl næstkomandi.