Aðskilnaðarsinnar sigruðu í þingkosningum í Quebec

Flokkur aðskilnaðarsinna var sigurvegari þingkosninganna í Quebec ríki í Kanada.

Samkvæmt fyrstu tölum fær flokkurinn 58 af þeim 125 þingsætum sem voru í boði. Í frétt um málið á BBC segir að reiknað sé með að flokkurinn myndi minnihlutastjórn í Quebec í framhaldinu eftir að hafa verið þar í níu ár í stjórnarandstöðu.

Ekki er ljóst hvort flokkurinn muni að nýju halda þjóðaratkvæðagreiðslu í ríkinu um aðskilnað þess frá Kanada. Slíkar atkvæðagreiðslur voru haldnar árin 1980 og 1995 en án árangurs fyrir aðskilnaðarsinnana.

Það þótti setja ljótann svip á kosningar þessar í gærkvöldi að skotárás var gerð á formann flokks aðskilnaparsinna þegar hann flutti sigurræðu sína. Formaðurinn slapp en einn maður fórst og annar særðist í árásinni. Skotmaðurinn var handtekinn.