Ein byssa var notuð við morðin í Frakklandi

Franska lögreglan hefur upplýst að aðeins ein byssa hafi verið notuð þegar fjölskylda frá Bretlandi var myrt þar sem hún var á ferðalagi á bifreið sinni í Frakklandi í síðustu viku. Enn er ekkert vitað um ástæðu morðanna.

Breska lögreglan hefur leitað að vísbendingum á heimili fjölskyldunnar í Claygate, litlum bæ rétt hjá London.

Í gær var sprengjuleitarsveit breska hersins kölluð á staðinn og voru hús í næsta nágrenni rýmd á meðan. Stuttu síðar var hættuástandi aflétt, en lögreglan sagði að nokkrir hlutir sem fundust í húsinu hefðu vakið áhyggjur.

Sjö ára dóttir myrtu hjónanna vaknaði úr dái á sunnudag en hafði ekki verið yfirheyrð í gær. Fjögurra ára systir hennar er komin til Bretlands, en hún gat litlar upplýsingar gefið.

Franska lögreglan hefur staðfest að 74 ára kona, sem var meðal hinna myrtu, hafi verið tengdamóðir fjölskylduföðurins og amma stelpnanna. Hún var með sænskan ríkisborgararétt en ættuð frá Írak eins og aðrir úr fjölskyldunni.

Auk foreldra og ömmu stúlknanna var franskur hjólreiðamaður myrtur, en hann virðist hafa af tilviljun átt leið fram hjá þegar morðin voru framin.

- gb