Fagna sigri en hafa samt misst völdin

Lýðræðissinnar í Hong Kong hafa misst meirihluta sinn á landsþingi í kosningum, þrátt fyrir að hafa fengið meirihluta atkvæða almennings.

Albert Ho, leiðtogi Lýðræðisflokksins í Hong Kong, sagði af sér í gær eftir að lýðræðisflokkar höfðu misst meirihluta í þingkosningum á sunnudag.

Hann segir lélegan árangur lýðræðissinna í kosningunum fyrst og fremst því að kenna hve mikill og hávær ágreiningur hefur verið innan fylkingar lýðræðissinna, sem skiptist í marga litla flokka.

Kosningaþátttakan var 53 prósent, sem þykir gott og bendir til þess að almenningur vilji breytingar og sé óánægður með landstjórann C.Y. Leung, sem er fulltrúi Kínastjórnar.

Undanfarnar vikur hafa verið fjölmenn mótmæli gegn áformum stjórnarinnar um að tryggja Kínastjórn meiri völd í Hong Kong. Mótmælin urðu til þess að stjórnin hvarf frá þessum áformum, en enginn lýðræðisflokkanna hefur samt náð að tryggja sér yfirgnæfandi stuðning.

Flokkar lýðræðissinna fengu þannig aðeins 27 þingsæti af alls 70, þrátt fyrir að hafa fengið rúman meirihluta af atkvæðum almennings. Atkvæði almennings ráða hins vegar einungis fjörutíu þingsætum, því þrjátíu þingsæti eru kosin af fyrirtækjum og hagsmunasamtökum í Hong Kong. Í flestum tilfellum eru það fulltrúar eða fylgjendur Kínastjórnar sem fara með yfirráð í þessum fyrirtækjum og hagsmunasamtökum.

Flokkar sem fylgja Kínastjórn að málum fengu því 43 þingsæti og eru með öruggan meirihluta á nýja þinginu. Lýðræðisflokkarnir héldu samt nægum þingmannafjölda til að geta komið í veg fyrir stjórnarskrárbreytingar, og geta því stöðvað öll hugsanleg áform nýja meirihlutans um að draga úr lýðræði í Hong Kong og færa aukin völd til Kínastjórnar. Hong Kong var breskt yfirráðasvæði til ársins 1997, en þá rann út samningur um yfirráð Breta og Hong Kong fór undir Kínastjórn. Íbúum í Hong Kong var þó lofað að fá að hafa heimastjórn í að minnsta kosti fimmtíu ár með óbreyttu viðskiptafrelsi, þrátt fyrir að Kína tæki við yfirráðunum.

Kínastjórn hefur einnig lofað Hong Kong-búum að fá að kjósa sér sjálfir landstjóra árið 2017 og að allt þingið verði kosið af íbúum frá og með 2020.

gudsteinn@frettabladid.is