Tilraun til hættulegrar árásar

Hæstiréttur staðfesti í gær dóm yfir 38 ára gömlum karlmanni, Herði Þráinssyni, fyrir fjölmörg brot. Hann hafði verið dæmdur í tveggja og hálfs árs fangelsi í héraðsdómi.

Maðurinn ók jeppa á útkeyrsluhurðir á Slökkvistöð höfuðborgarsvæðisins í Skógarhlíð í júní árið 2009. Hann hafði áður hótað að skaða lögreglumenn eða opinbera starfsmenn og reyndi að keyra inn í samskiptamiðstöð lögreglunnar. Lögregla reyndi að stöðva manninn í Skógarhlíð en án árangurs. Hann ók þá á miklum hraða eftir Bústaðavegi og á Snorrabraut, þar sem hann ók á bíl. Hann ók svo áfram að lögreglustöðinni á Hverfisgötu þar sem lögreglubíll keyrði á hann og stöðvaði hann.

Maðurinn var sakfelldur fyrir brot gegn valdstjórninni, tilraun til sérstaklega hættulegrar líkamsárásar og eignaspjöll. Þá var hann dæmdur fyrir umferðarlagabrot. Maðurinn var undir áhrifum áfengis og fíkniefna þegar atvikið varð, en hann var einnig dæmdur fyrir önnur fíkniefnalagabrot. Honum var gert að greiða allan sakarkostnað og var sviptur ökuréttindum ævilangt, en héraðsdómur hafði svipt hann ökuréttindum í þrjú ár. - þeb