Blatter segir vítakeppnir vera ósanngjarnar

Sepp Blatter, forseti FIFA, er á því að fótboltaleikur geti breyst í harmleik þegar úrslitin ráðast í vítakeppni eins og í úrslitaleik Meistaradeildarinnar á dögunum þar sem Chelsea vann Bayern München í vítaspyrnukeppni eftir að þýska liðið hafði verið í stórsókn mest allan leikinn.

„Fótbolti getur breyst í harmleik þegar leikur fer í vítakeppni. Fótbolti á ekki að breytast í keppni milli tveggja leikmanna því þegar það gerist þá tapar hann kjarna sínum," sagði Sepp Blatter við BBC. Framundan er EM í Póllandi og Úkraínu og það má búast við því að örlög einhverja þjóða ráðist í vítakeppni.

„Ef til vill getur Franz Beckenbauer og nefndin hans fundið einhverja lausn á þessu, kannski ekki í dag en vonandi í framtíðinni," sagði Blatter. Franz Beckenbauer fer fyrir FIFA Task Force Football 2014 nefndinni sem leitar leiða til að gera fótboltann betri á öllum stigum hans.