Amerískur frumbyggi gerður að dýrlingi

Benedikt páfi XVI gerði sjö manneskjur að kaþólskum dýrlingum í dag. Þeirra á meðal er frumbyggi frá Ameríku sem vakti athygli trúboða á sínum tíma.

Páfinn gerði fólkið að dýrlingum af því tilefni að í dag hefst nokkurs konar átak til að styrkja trú þeirra sem eru trúaðir fyrir. Átakið nefnist Ár trúarinnar.

Kateri Tekakwitha bjó í Ameríku á 17. öld. Á síðari tímum er talið að hún hafi gert fjölda kraftaverka, þeirra á meðal að lækna ungt barn af sjúkdómi. Þetta þótti nægja til að gera hana að kaþólskum dýrlingi en fréttaritari BBC heldur því einnig fram að útnefningin sé hugsuð til að gefa innfæddum, bandarískum kaþólikkum aukið vægi.

Fjöldi bandarískra kaþólikka af indíanakyni voru samankomnir í Róm þegar tilkynnt var um útnefninguna og fögnuðu henni syngjandi skrýddir fjaðraskrauti.

Páfinn gerði auk Tekakwitha sex aðrar manneskjur að dýrlingum. Þeirra á meðal voru þýsk nunna, ítalskur prestur og spænsk nunna.

BBC segir frá þessu.