Arsenal marði sigur á Jóhannesi og félögum

Arsenal er komið áfram í fimmtu umferð enska bikarsins eftir sigur á Jóhannesi Karli Guðjónssyni og félögum í Huddersfield. Nicklas Bendtner kom heimamönnum yfir á 21. mínútu leiksins en boltinn fór í netið eftir viðkomu í Peter Clarke varnarmanni Huddersfield.

Sébastien Squillaci fékk að líta rauða spjaldið á 42. mínútu og því léku Arsenal einum leikmanni færri það sem eftir lifði leiksins.

Huddersfield nýttu sér liðsmuninn því Alan Lee skoraði á 66. mínútu leiksins og jafnaði metin. Arsenal tryggði sér hins vegar sigurinn úr vítaspyrnu. Úr henni skoraði Cesc Fàbregas á 86. mínútu og tryggði heimamönnum sigur á Huddersfield sem leikur í þriðju efstu deild.

Jóhannes Karl Guðjónsson lék allan leikinn í liði Hudderfield og var ógnandi á miðjunni. Arsenal gæti hafa orðið fyrir áfalli því Samir Nasri þurfti að fara af velli vegna meiðsla og gætu þau reynst alvarleg.