Mancini: Það verður mjög erfitt að ná United

Roberto Mancini, stjóri Manchester City, viðurkenndi eftir tapið á móti nágrönnunum í Manchester United á Old Trafford í gær að það yrði mjög erfitt fyrir sitt lið að ná toppliðinu í þeim ellefu leikjum sem City á eftir.

„Það var aðeins frábært mark sem gat gert út um þennan leik. Sanngjörn úrslit hefði samt verið jafntefli. Við spiluðum mjög vel í þessum leik og ég er stoltur af mínum leikmönnum," sagði Roberto Mancini.

„Ég hélt að við gætum unnið þennan leik. Í stöðunni 1-1 fannst mér við eiga möguleika á því að vinna leikinn. Þá kom þetta frábært mark frá Rooney og það breytti leiknum," sagði Mancini.

Eftir tapið þá er City átta stigum á eftir United og er auk þess búið að spila einum leik meira.

„Það verður mjög erfitt að ná United en við verðum að lifa í voninni og halda áfram. Við töpuðum leik í dag sem við áttum ekki skilið að tapa og kannski förum við líka að vinna leiki sem við eigum kannski ekki skilið að vinna," sagði Ítalinn smekklegi.