Anelka ekki spenntur fyrir því að fara til Liverpool

Samkvæmt fréttavef Sky Sports mun Nicolas Anelka ekki hafa mikinn áhuga á því að ganga til liðs við Liverpool sem skiptimynd í kaupum á Fernando Torres.

Chelsea hefur boðið 35 milljórnir punda í Torres sem er á mála hjá Liverpool. Því tilboði var hafnað en enskir fjölmiðlar hafa greint frá því að félagið sé reiðubúið að láta hann fara fyrir 50 milljónir punda.

Liverpool er einnig sagt hafa áhuga á því að hluti af samkomulaginu verði að Anelka gangi til liðs við Liverpool. En sjálfur virðist franski framherjinn ekki spenntur fyrir því.

Anelka er markahæsti leikmaður Chelsea á leiktíðinni og líður vel í Lundúnum. Hann vill áfram berjast fyrir sínu hjá félaginu.

Hann á að baki langan feril og lék með Liverpool árið 2002 sem lánsmaður frá Paris St. Germain.

Hann hefur einnig leikið með Arsenal, Real Madrid, Manchester City, Fenerbahce og Bolton. Anelka hefur verið hjá Chelsea síðan 2008.