Ferguson: Þetta eru mikil vonbrigði

Sir Alex Ferguson, stjóri Man. Utd, var að vonum svekktur eftir tapið gegn Úlfunum í kvöld en þetta var fyrsta deildartap United í 30 leikjum.

"Þetta eru mikil vonbrigði enda erum við búnir að vera lengi á siglingu. Við komumst bara aldrei í gang í síðari hálfleik. Það er erfitt að ráða við Úlfana í föstum leikatriðum og það sýndi sig enn og aftur í kvöld," sagði Ferguson en United hefði getað náð sjö stiga forskoti í deildinni hefði liðið lagt botnliðið.

"Þarna var tækifæri fyrir okkur til þess að halda áfram á frábærri sigurgöngu en stöðugleikinn sem við höfum sýnt var ekki til staðar."

Ferguson greindi einnig frá því að Rio Ferdinand verði líklega frá í tvær vikur en hann meiddist á kálfa í upphitun í kvöld.