Konungur sáttur við forsætisráðherra

Jens Stoltenberg forsætisráðherra Noregs hefur viðurkennt að það hafi verið mistök að fela ekki Haraldi konungi að sæma norska hermenn heiðursmerkjum  á degi uppgjafahermanna um síðustu helgi. Mjög sterk viðbrögð urðu við því þegar norska Dagbladet skýrði frá því að ríkisstjórnin hefði hafnað aðkomu konungs.

 

Stoltenberg hringdi sjálfur í Dagbladet í gærkvöldi til þess að segja að þarna hefðu verið gerð mistök. Hans hátign yrði héðan í frá boðið að afhenda orðurnar. Haraldur konungur var sáttfús og sagði að málinu væri lokið í góðri sátt við forsætisráðherrann. Hermönnunum sem voru heiðraðir yrði boðið til móttöku í höllinni.