Aðgerðaáætlun OR staðist á þessu ári

Útlit er fyrir að Orkuveita Reykjavíkur (OR) nái markmiðum sínum um hagræðingu í rekstri og gott betur á þessu ári. Í lok þriðja ársfjórðungs hafði fyrirtækið þegar sparað sem jafngildir rúmum 97 prósentum af markmiði ársins.

Stjórn og eigendur OR samþykktu í apríl aðgerðaáætlun sem miðar að því að gera fyrirtækinu kleift að standa við afborganir af skuldum sínum. Stendur OR frammi fyrir stórum gjalddögum á næstu árum sem samanlagt nema 113 milljörðum króna til og með árinu 2017.

Áætlun OR nefnist „Planið“ og nær til ársins 2016. Í áætluninni hefur fyrirtækið sett sér markmið um hagræðingu í rekstri á hverju ári til og með 2016. Mun fyrirtækið framvegis birta skýrslu um hvernig gengur að ná settum markmiðum stuttu eftir birtingu ársfjórðungsuppgjörs. Fyrsta slíka skýrslan var birt í gær.

Í áætlun Orkuveitunnar var gert ráð fyrir 11,5 milljarða króna sparnaði á síðustu þremur fjórðungum ársins. Á öðrum og þriðja ársfjórðungi hefur þegar náðst fram sparnaður sem nemur 11,2 milljörðum og er því ljóst að aðhaldsaðgerðir fyrirtækisins hafa borið meiri ávöxt en reiknað var með. Tekist hefur að lækka rekstrarkostnað talsvert meira en gert var ráð fyrir og sömuleiðis tekist að spara með minni fjárfestingu í veitukerfi um meira en gert var ráð fyrir. Þessi árangur hefur náðst þrátt fyrir að áhrif ytri breyta, svo sem þróunar gengis krónunnar og álverðs, hafi kostað fyrirtækið 308 milljónir. Þó ber að hafa í huga að tekjur upp á rétt tæpa 8 milljarða má rekja til víkjandi láns frá eigendum fyrirtækisins.

Á því sex ára tímabili sem aðgerðaáætlunin nær til hyggst Orkuveitan ná fram sparnaði sem nemur rétt rúmum 50 milljörðum. Þar af eiga 10 milljarðar að koma frá sölu eigna, 12 milljarðar koma í formi víkjandi láns frá eigendum fyrirtækisins, 15 milljarðar eiga að koma til vegna minni fjárfestinga í veitukerfi fyrirtækisins og rúmir 8 milljarðar með hækkunum á gjaldskrám fyrirtækisins. Á tímabilinu verða gjaldskrár hækkaðar tvisvar á ári til að halda í við þróun verðbólgu, en það var eitt af skilyrðum eigenda fyrirtækisins fyrir lánveitingunni.

magnusl@frettabladid.is