Bremsa brást er vindmylla fauk af mastri

„Það er ekki mikið sem hægt er að segja við svona uppákomu,“ segir Friðrik Sigurðsson, talsmaður sænska fyrirtækisins Hannevind, sem framleiddi vindmylluna sem stórskemmdist í Belgsholti í Leirársveit.

Vindmyllan í Belgsholti var sett upp í byrjun júlí í sumar. Hún er eina vindmyllan hérlendis sem tengd er almenna raforkukerfinu. Mótorinn og spaðinn fuku af myllunni í hvassviðri í síðustu viku.

Haraldur Magnússon í Belgsholti segist hafa séð til myllunnar um fimmtán mínútum fyrir óhappið. Þá hafi spaðarnir snúið öfugt og myllan í raun unnið gegn vindinum. Hann hafi þó ákveðið að aðhafast ekki enda ætti sjálfvirkur búnaður að sjá til þess að haga stefnunni eftir vindum. „Þegar ég kom úr fjósinu rúmlega tíu sá ég að hún var komin niður. Ég veit ekki hvort það var forritið eða nemar sem eiga að lesa úr aðstæðum sem brugðust,“ segir hann.

„Nú verður að vinna markvisst að því að komast að raunverulegum orsökum óhappsins. Það er ekki létt að segja til um hvað setti þetta ferli í gang, þar sem enginn sjónarvottur var að því, svo það einkennist af getgátum sem allar geta átt við rök að styðjast eins og er,“ segir Friðrik.

Enn hefur ekki verið ákveðið hvenær endurbygging vindmyllunnar hefst. Haraldur segist vonast til að verkið taki hann ekki meira en tvo mánuði. „Það verður farið gegnum allt frá grunni með innlendum starfsmönnum ásamt frumhönnuði vindmyllunnar, sem verður með í því verki,“ segir Friðrik, sem nú kveður unnið að því að panta þá hluti sem skipta þurfi um. Síðan verði gerð áætlun um framgang endurbyggingarinnar. „Útkoman verður að vera sú að við fáum betri vindmyllu sem nýtist helst sem flestum sem hyggja á græna orkuöflun til framtíðar.“

Á heimasíðu Belgsholts segir að myllan hafi unnið eðilega í snörpum vindhviðum þennan þriðjudagsmorgun þar til um klukkan 9.35 að hún hafi snúið sér á hlið eins og forritið gefi skipun um. Þá eigi bremsubúnaður að stöðva spaðana og myllan að snúa sér þannig að sem minnst átak sé á þá.

„En það sem gerist er að spaðarnir stöðvast ekki og þegar stjórnbúnaðurinn hefur snúið mylluhúsinu í 180 gráður á vindstefnu án þess að þeir hafi stöðvast verður of mikið álag á spaðana sem eru úr trefjagleri og einn spaðinn brotnar. Við það kemur mjög mikið átak á festingar og þar sem mylluhúsið er rúmt tonn að þyngd þá losnar það af legunni og fellur til jarðar,“ segir á belgsholt.is

gar@frettabladid.is