Tæplega 1.100 bíða eftir félagslegri íbúð

Nær 1.100 manns bíða eftir félagslegu leiguhúsnæði í Reykjavík, Hafnarfirði og Kópavogi. Um síðustu mánaðamót biðu 706 eftir félagsíbúð í Reykjavík en af þeim uppfylla 412 skilyrði um að gerast leigutakar hjá Félagsbústöðum. Langflestir þessara 412 umsækjenda, eða 349 manns, bíða eftir eins til tveggja herbergja íbúð.

Ekki eiga þó allir á biðlistanum hjá Félagsbústöðum rétt á að fá félagslega leiguíbúð.

„Fólk kemst inn á listann ef það er undir skilgreindum tekju- og eignamörkum. Síðan eru félagslegar og fjárhagslegar aðstæður umsækjenda greindar og atvinnuaðstæður kannaðar. Ef viðkomandi uppfyllir skilyrði um sérstakar húsaleigubætur getur hann fengið leigt hjá okkur. Hinir fá að vera inni á listanum en ef aðstæður þeirra breytast ekki eru ekki líkur á úthlutun félagslegrar íbúðar,“ segir Sigurður Kr. Friðriksson, framkvæmdastjóri Félagsbústaða.

Félagsbústaðir eiga nú 2.150 íbúðir en af þeim eru 312 svokallaðar þjónustuíbúðir fyrir aldraða. Lítið hefur verið keypt af íbúðum frá hruni eða aðeins fjórar til fimm á ári að meðaltali. Engar íbúðir eru í framleigu á vegum Félagsbústaða, að því er Sigurður greinir frá.

Hann getur þess að ekki hafi fjölgað á biðlistanum á undanförnum árum. „Það er vegna þess að íbúðum hefur fjölgað á almenna markaðnum og fólk hefur getað notað almennu og sérstöku húsaleigubæturnar til þess að leigja á honum.“

Í Kópavogi eru 256 á biðlista eftir félagslegu húsnæði en leiguíbúðir í eigu bæjarins eru 385. Engar íbúðir eru í framleigu, að sögn Örnu Schram upplýsingafulltrúa.

Kópavogsbær hefur keypt og byggt 88 félagslegar íbúðir á undanförnum fimm árum.

Í Hafnarfirði er 131 á biðlista eftir félagslegri leiguíbúð. Hafnarfjarðarbær á 227 leiguíbúðir og framleigir 11 íbúðir. Undanfarin fimm ár hefur bærinn keypt tíu íbúðir á ári.

Rannveig Einarsdóttir, sviðsstjóri fjölskylduþjónustu Hafnarfjarðar, segir að á undanförnum árum hafi fækkað á biðlistanum með tilkomu sérstakra bóta. „Sumir kjósa frekar að fá sérstakar húsaleigubætur og leigja á almennum markaði en að fara í leiguíbúð hjá Hafnarfjarðarbæ.“

ibs@frettabladid.is