Refsað fyrir hallafjárlögin

Þingmenn Kaliforníuríkis fá engin laun greidd fyrr en þeim tekst að afgreiða hallalaus fjárlög. Búist er við því að þeir þurfi að minnsta kosti viku til að ljúka verkinu.

John Chiang, fjármálastjóri Kaliforníuríkis, tók þessa ákvörðun í samræmi við lög sem Kaliforníu-búar samþykktu í þjóðaratkvæðagreiðslu í nóvember síðastliðnum.

Samkvæmt þessum lögum má svipta þingmenn bæði launum og dagpeningum takist þeim ekki að afgreiða hallalaus fjárlög fyrir 15. júní ár hvert. Launagreiðslur hefjast að nýju um leið og fjárlög liggja fyrir, en launalausi tíminn verður þó ekki bættur með eftirágreiðslu launa.

Lögin voru borin undir þjóðaratkvæði til þess að skapa þrýsting á þingmenn, sem á hverju ári hafa skilað fjárlögum löngu eftir að tilskilinn frestur til þess, nefnilega 15. júní, er liðinn.

Þingmennirnir lögðu því óvenju hart að sér í ár og fögnuðu ákaft þegar fjárlög voru samþykkt á síðustu stundu. Gleðin rann hins vegar fljótt af þeim þegar fjármálastjórinn skýrði frá launasviptingunni, enda voru þessi fjárlög ekki hallalaus.- gb