Verður vísað úr landi

Öllum erlendum borgurum í Danmörku sem gerast sekir um glæpi verður vísað úr landi, verði frumvarp stjórnarflokkanna samþykkt á föstudag.

Frumvarp Sörens Pind, ráðherra innflytjendamála, nýtur stuðnings tveggja stærstu stjórnarandstöðuflokkanna, en samkvæmt því verður erlendum brotamönnum sem dæmdir eru til fangavistar sjálfkrafa vísað úr landi. Þó eru gerðar undantekningar ef dómstólar fallast á að sýnt hafi verið fram á að brottvísunin brjóti sannarlega í bág við alþjóðasamninga.

Með því er sönnunarbyrði komið yfir á þá dæmdu, en samkvæmt núgildandi lögum verður ákæruvaldið að krefjast brottvísunar.

Í samtali við danska blaðið Information segir Eva Smith, lögfræðiprófessor við Kaupmannahafnarháskóla, að nýja löggjöfin muni leiða til þess að oftar verði farið á svig við samninga og það sé áhyggjuefni.

Formaður Mannréttindastofnunar tekur undir það og segir að eftir því sem fleiri vafatilvik komi upp, verði líklegra að farið verði yfir mörk sem alþjóðasamningar setja.- þj