Tíðni krabbameins og sykursýki er há

Danskir karlar eru í áhættuhópi hvað varðar krabbamein og áunna sykursýki og lifa skemur en kynbræður þeirra í nágrannaríkjunum.

Skýrsla á vegum Evrópusambandsins var birt nýlega og tók til ástandsins í 33 löndum. Þar kom í ljós að karlar eru almennt við verri heilsu en konur og er þar mörgu um að kenna. Til dæmis eru konur líklegri til að leita til læknis og ef menn fara yfirhöfuð í læknisskoðun er það oft of seint.

Það sem er mest sláandi varðandi heilsufar danskra manna er tíðni krabbameins, en þarlendum mönnum er afar hætt við að fá krabbamein í endaþarm, eistu og blöðruhálskirtil.

„Við höfum ekki gert nóg,“ sagði Svend Aage Madsen, yfirlæknir á Ríkissjúkrahúsinu, í samtali við Berlingske tidende. „Sjúkdómurinn uppgötvast síðar og dánartíðni er hærri en í öðrum löndum. Málin standa ekki vel í Evrópu, en sérlega illa í Danmörku.“

Félagsskapur um heilbrigðismál karlmanna þar í landi segir bráða þörf vera á sérstakri heilbrigðisstefnu fyrir karlmenn, bæði hvað varðar fræðslu og meðhöndlun. - þj