Bændur fái E.coli bætur

Evrópskir bændur sem orðið hafa fyrir búsifjum vegna E.coli-bakteríunnar munu fá samtals 150 milljónir evra í styrki frá Evrópusambandinu, samkvæmt tillögu frá framkvæmdastjórn sambandsins.

E.coli-faraldurinn sem nú geisar hefur orðið 24 að bana auk þess sem 2.400 manns hafa veikst. Faraldurinn hefur orðið til þess að sala á grænmeti hefur hrunið, þar sem ekki er vitað í hverju og hvar faraldurinn hófst. Spánverjar hafa krafist bóta frá Þýskalandi vegna ásakana um að sökin lægi hjá spænskum agúrkum, sem reyndist ekki rétt. Spænskir ávaxta- og grænmetisútflytjendur telja að tapið sé 225 milljónir evra á viku. Á Ítalíu er rætt um 100 milljónir evra í tap, 50 milljónir í Hollandi og 30 milljónir í bæði Þýskalandi og Frakklandi. Bæturnar sem framkvæmdastjórnin lagði til eru því aðeins lítill hluti af tapinu.

Landbúnaðarráðherrar ESB-ríkjanna hittust á neyðarfundi í Lúxemborg í gær og hafa ráðherrar Spánar og Frakklands báðir lýst því yfir að þeim þyki bæturnar ekki fullnægjandi. Ekki var rætt um bætur til fórnarlamba í gær, enda fundurinn um landbúnað.

Einnig var rætt um faraldurinn á Evrópuþinginu í gær. Spænski þingmaðurinn Francisco Sosa-Wagner var meðal þeirra sem tóku þátt í umræðum um málið. Þar hélt hann agúrku á lofti og sagði nauðsynlegt að endurheimta heiður agúrkunnar.

Dacian Ciolos, yfirmaður landbúnaðarmála hjá ESB, sagðist í gær vonast til þess að yfirvöld í Þýskalandi gætu greint frá uppruna bakteríunnar innan skamms. „Án svars verður erfitt að endurheimta traust neytenda, sem er nauðsynlegt til að markaðurinn nái sér á strik.“

Þá hefur Alþjóðaheilbrigðisstofnunin sagt að finna verði uppruna faraldursins fljótt. Sérfræðingur hjá stofnuninni hefur sagt að rannsóknir Þjóðverja á málinu hafi verið handahófskenndar. Erfitt sé að komast til botns í máli sem þessu, en það sé hægt. Nú er beðið eftir niðurstöðum úr baunaspírum af lífrænu býli suður af Hamborg, en talið er að þær geti legið fyrir í dag.thorunn@frettabladid.is