Helmingur fjölskyldugarða verið leigður út

Góð viðbrögð hafa verið við því útspili borgaryfirvalda að bjóða fjölskyldum til leigu matjurtabeð þar sem skólagarðar hafa verið hingað til. Eins og fram kom í Fréttablaðinu í gær verða Skólagarðar Reykjavíkur lagðir niður í hagræðingarskyni. Rekstur þeirra kostaði borgina 24 milljónir króna í fyrra.

Skólagarðarnir hófu göngu sína á Klambratúni sumarið 1948. Gunnar Hersveinn, upplýsingafulltrúi umhverfissviðs borgarinnar, segir aðspurður að athugasemdir hafi borist vegna þess að skólagarðarnir séu nú lagðir niður. „Eitt kvörtunarbréf hefur borist,“ segir Gunnar.

Varðandi viðbrögð í gær eftir að Fréttablaðið sagði frá því að skólagarðarnir yrði lagðir niður en fjölskyldum þess í stað gefinn kostur á að leigja beðin þá segir Gunnar þau fyrst og fremst hafa verið frá foreldrum sem vilji panta fjölskyldugarð.

„Oft er nefnt að fjölskyldan vilji vera með garð í nágrenni sínu þar sem skólagarðar voru áður og rækta karftöflur og kál. Þetta er í samræmi við aukinn áhuga almennings frá 2009 á að vera með matjurtagarð og rækta sitt eigið grænmeti. Ég býst við að það muni sem sagt festa sig aftur í sessi að fjölskyldan verði með matjurtagarð og kenni börnunum að rækta,“ segir Gunnar sem kveður enn um þrjú hundruð beð laus. Skikarnir eru alls um sex hundruð talsins.

- gar