Seldur til 37 landa á níu dögum

„Þetta er framar okkar björtustu vonum," segir Guðmundur Freyr Jónasson.

Önnur útgáfa af Tunerific-gítarstilli þeirra Guðmundar Freys og Jóhanns P. Malmquist, prófessors, hefur verið seld til 37 landa á aðeins níu dögum. Forrit með nýju útgáfunni var í byrjun mars sett inn í OVI-netverslun finnska farsímafyrirtækisins Nokia fyrir nýjustu símana þeirra N8. Það hefur heldur betur slegið í gegn og náði það hæst í fjórða sæti lista yfir þau forrit sem voru vinsælust hjá fyrirtækinu. Búið er að þýða forritið yfir á sex tungumál og þýðing yfir á kínversku er einnig í undirbúningi.

Tunerific er gagnvirkur gítar- og tónastillir. Einnig fylgir með hugbúnaðinum hljómabók með 336 hljómum. Forritið hefur alls verið selt til 77 landa og er að auki fáanlegt í 190 löndum.

Guðmundur er hæstánægður með árangurinn til þessa. „Þetta er akkúrat það sem við vorum að vonast eftir. Þetta er glænýtt viðmót hannað af grafískum hönnuði. Það var ekkert til sparað í þessari útgáfu en við höfðum minni peninga á milli handanna í fyrstu útgáfunni," segir hann. „Við erum að reyna að beita nýjum markaðsaðferðum til að halda okkur sýnilegum í þessum stóra heimi forrita."

Nokia hefur notað gítarstillinn í kynningarherferðum sínum að undanförnu, þar á meðal í Ísrael. Þar er tákni forritsins stillt upp við hliðina á risum á borð við Facebook og Youtube.

Gítarstillirinn varð til úr meistaraverkefni Guðmundar Freys við Háskóla Íslands í samstarfi við leiðbeinanda hans, Jóhann P. Malmquist. Þeir reka nú saman sprotafyrirtækið Hugvakann, sem hefur það verkefni að sækja á fleiri markaði og þróa frekari forrit í farsíma. Til þess hafa styrkir frá tækniþróunarsjóði Rannís komið að góðum notum. -fb

Hér fyrir ofan má sjá kynningarmyndband sem gert var fyrir fyrri útgáfu Tunerific.