600 veikir af völdum blýeitrunar

Í Kína hafa rúmlega 600 manns, þar af 103 börn, veikst í nýjasta blýeitrunartilfellinu þar í landi en Kínverjar hafa undanfarin ár mátt glíma við mikil vandamál sökum mengurnar af völdum þungamálma.

Þúsundir barna, sem búa í nágrenni málmbræðslna og rafhlöðuverksmiðja, hafa orðið fyrir blýeitrun frá árinu 2009 en fórnalömbin í þessu nýjasta tilfelli voru verkamenn álpappírsverksmiðja í austanverðu landinu og börn þeirra. Framleiðslu hefur nú verið hætt í öllum 25 verksmiðjunum sem hlut áttu að máli.

Blýeitrun getur skaðað vöðva- og taugakerfi auk þess semhún getur haft áhrif á frjósemi þeirra einstaklinga sem fyrir henni verða. 129 þeirra sem veiktust hafa verið greindir með alvarlega blýeitrun, en 103 þeirra eru börn.