Enskir fjölmiðlar reikna með öðru tilboði frá Chelsea

Eins og búast mátti við eru fjalla ensku dagblöðin ítarlega um tilraun Chelsea til að kaupa Fernando Torres frá Liverpool.

Á föstudagsmorgun var greint frá því að Liverpool hafi hafnað 35 milljóna punda tilboði frá Chelsea í Torres.

Torres sjálfur lagði svo inn beiðni um félagaskipti. Hann vill því fara til Chelsea en Liverpool hafnaði beiðninni umsvifalaust.

Nú eru enskir fjölmiðlar að gefa í skyn að Liverpool sé reiðubúið að hlusta á tilboð frá Chelsea. En félagið metur Torres á 50 milljónir punda og vill líka fá Nicolas Anelka til Liverpool í skiptunum.

Götublaðið News of the World segir að Liverpool vilji fá 45 milljónir punda í peningum og Anelka þar að auki fyrir Torres.

Sum blöð segja að Liverpool muni leyfa Torres að fara fyrir 50 milljónir punda og önnur segja að Chelsea muni leggja fram 50 milljóna punda tilboð í Torres. Samkvæmt því virðist líklegra en ekki að félagaskiptin munu eiga sér stað.

En enn sem komið er hafa fjölmiðlarnir ekkert fram að bjóða nema vangaveltur og nafnlausar heimildir. Félagaskiptaglugginn lokar annað kvöld og hafa því félögin ekki langan tíma til að komast að samkomulagi.