Wayne Rooney með tvö mörk í 3-1 sigri Manchester United

Manchester United ætlar ekkert að gefa eftir í ensku úrvalsdeildinni og lék í kvöld sinn 29. deildarleik í röð án þess að tapa en 24 leikjanna hafa verið á þessu tímabili. Þetta er jöfnun á félagsmetið og United er því áfram með fimm stiga forskot á Arsenal sem vann einnig sinn leik í kvöld.

Wayne Rooney skoraði sína fyrstu tvennu síðan í mars á síðasta ári þegar Manchester United vann 3-1 sigur á Aston Villa á Old Trafford. Þetta var níundi heimasigur United í röð í deildinni en liðið hefur náð í 37 stig af 39 mögulegum í leikhúsi draumanna á þessu tímabili.

Wayne Rooney hafði aðeins skorað tvö mörk í fyrstu fjórtán deildarleikjum sínum á þessu tíambili en það er ekki góðar fréttir fyrir hin liðin í toppbaráttunni að Rooney sé kominn í gang á nýjan leik.

Það tók Manchester United aðeins 50 sekúndur að komast í 1-0. Edwin van der Sar var fljótur að taka aukaspyrnu fyrir framan teiginn sinn og sendi hárnákvæma sendingu inn fyrir á Wayne Rooney sem tók boltann niður og afgreiddi hann glæsilega í markið.

Rooney endaði síðan fyrri hálfleikinn eins og hann byrjaði hann þegar hann kom United í 2-0 á 46. mínútu með marki úr markteig eftir frábæran undirbúning frá Nani.

Darren Bent minnkaði muninn í 2-1 á 58. mínútu þegar hann skoraði auðveldlega úr markteignum eftir skyndisókn og fyrirgjöf frá Stewart Downing.

Rooney lagði síðan upp þriðja markið fyrir Nemanja Vidic sem skoraði með stórglæsilegu skoti utan úr teig á 60. mínútu. United gat bætt við mörkum þar á meðal Wayne Rooney en mörkin urðu ekki fleiri.

Wigan tókst ekki að komast upp úr fallsæti þrátt fyrir að komast yfir á móti West Bromwich Albion í miklum fallbaráttuslag á The Hawthorns, heimavelli West Bromwich í kvöld. West Bromwich tókst að tryggja sér 2-2 jafntefli ellefu mínútum fyrir leikslok.

Peter Odemwingie kom heimamönnum yfir í 1-0 strax á 5. mínútu en tvær aukaspyrnur breyttu stöðunni fyrir hálfleik. Charles N'Zogbia fékk aukaspyrnu á vítateigslínunni á 20. mínútu, tók hana sjálfur og skoraði með viðkomu í varnarmanni.

Ben Watson kom Wigan síðan í 2-1 á 43. mínútu þegar aukaspyrna hans utan af kanti sigldi alla leið í markið. Marc-Antoine Fortuné jafnaði metin á 79.mínútu eftir fyrirgjöf frá Jerome Thomas.

Úrslit og markaskorarar í ensku úrvalsdeildinni í kvöld:

Arsenal-Everton 2-1

0-1 Louis Saha (24.), 1-1 Andrei Arshavin (70.), 2-1 Laurent Koscielny (75.)

Sunderland-Chelsea 2-4

1-0 Phillip Bardsley (4.), 1-1 Frank Lampard (15.), 1-2 Salomon Kalou (23.), 2-2 Kieran Richardson (26.), 2-3 John Terry (60.), 2-4 Nicolas Anelka (90.+3)

Manchester United-Aston Villa 3-1

1-0 Wayne Rooney (1.), 2-0 Wayne Rooney (45.+1), 2-1 Darren Bent (58.), 3-1 Nemanja Vidic (63.)

West Bromwich-Wigan 2-2

1-0 Peter Odemwingie (5.), 1-1 Charles N'Zogbia (20.), 1-2 Ben Watson (43.), 2-2 Marc-Antoine Fortuné (79.)