Mandela útskrifaður af spítala

Nelson Mandela, fyrrverandi forseti Suður Afríku, var útskrifaður af spítala í morgun. Þar hafði hann dvalið í tvær nætur. Læknir hans sagði í samtali við fréttamenn að Mandela, sem er 92 ára gamall, þjáðist af kvillum sem væru algengir hjá fólki á hans aldri. Hann hefði það hins vegar gott.

Fjölskylda og vinir heimsóttu Mandela á spítalann í gær og kom Winnie Mandela, fyrrverandi eiginkona hans, grátandi út af spítalanum. Fjölmargir túlkuðu þá atburðarrás þannig að Mandela væri í lífshættu.