Beckham mun velja á milli Paris Saint Germain og LA Galaxy

David Beckham er enn að ákveða sig hvar hann mun spila næst en hefur þó gefið það út að komi ekki til greina að aftur á Englandi eða á Ítalíu.

Beckham varð bandarískur meistari í fyrsta sinn með Los Angeles Galaxy á dögunum og hann er nú á sýningar- og keppnisferðlagi í Asíu með liði sínu.

Samkvæmt heimildum BBC segist Beckham ætla að ákveða það eftir Asíuförina hvar hann muni spila næst. Valið stendur nú á milli Galaxy og franska liðsins Paris Saint Germain.

Beckham er orðinn 36 ára gamall en hann hefur heyrt frá liðum á Englandi, Ítalíu og í Brasilíu. Það eina sem heillar hann í dag er að halda áfram með Galaxy eða samþykkja risasamning við franska liðið Paris Saint Germain.

Fjölskylda Beckham hefur komið sér vel fyrir í Los Angeles og því gæti hann framlengt samning sinn um eitt ár enda hefur hann látið það frá sér að hjónin vilja búa áfram í Bandaríkjunum eftir að fótboltaferli hans lýkur.

Það sem eykur hinsvegar líkurnar á að Beckham velji Paris Saint Germain er draumur hans að spila með breska landsliðinu á Ólympíuleikunum í London næsta sumar. Hann mun líka fá 11,6 milljónir punda fyrir 18 mánaða samning eða samsvarar meira en 2,1 milljarði íslenskra króna.