Kolbeinn skoraði tvö mörk fyrir Ajax í sigri á Vitesse

Kolbeinn Sigþórsson skoraði tvö mörk fyrir Ajax í kvöld þegar liðið vann 4-1 heimasigur á Vitesse í toppslag í hollensku úrvalsdeildinni. Ajax hefur náð í 10 stig af 12 mögulegum í fyrstu fjórum leikjum sínum á tímabilinu en liðið var með jafnmörg stig og Vitesse fyrir þennan leik.

Kolbeinn skoraði tvö síðustu mörk Ajax-liðsins í leiknum en áður höfðu þeir Christian Eriksen (53. mínúta) og Derk Boerrigter (62. mínúta) komið liðinu í 2-0. Kolbeinn skoraði fyrra markið sitt á 63. mínútu og það síðara leit dagsins ljós átta mínútum síðar. Hann fékk síðan heiðursskiptingu mínútu síðar. Alexander Büttner minnkaði muninn fyrir Vitesse-liðið í lokin.

Kolbeinn hefur þar með skorað í þremur leikjum í röð og hefur ennfremur átt þátt í marki í öllum fjórum deildarleikjum sínum í búningi Ajax-liðsins sem keypti hann frá AZ Alkmaar fyrir þetta tímabil.

Kolbeinn er markahæsti leikmaður deildarinnar ásamt Marc Janko hjá Twente en þeir hafa báðir skorað fjögur mörk.