Sífellt fleiri þurfa nýrnaaðgerðir

Sautján Íslendingar hafa gengist undir nýrnaígræðslu í ár sem er metfjöldi. Ríflega helmingi fleiri hafa greinst með nýrnabilun það sem af er árinu en síðustu ár.

Tíðni nýrnabilunar hefur í gegnum tíðna verið nokkuð lægri hér á landi en hjá nágrannaþjóðum okkar. Síðustu ár hefur hins vegar orðið breyting á og sífellt fleiri leitað sér meðferðar á nýrnadeild Landspítalans.

„Á síðustu fimm árum þá hefur orðið veruleg aukning eða um og yfir fimmtíu prósent og á árinu 2010 þá voru það 34 einstaklingar sem hófu meðferð vegna nýrnabilunar á lokastigi. Annað hvort með blóðhreinsun eða ígræðslu nýra," segir Runólfur Pálsson, yfirlæknir nýrnalækninga á Landspítalanum.

Stór hluti þessa hóps þarf að fara í nýrnaígærðslu og hefur slíkum aðgerðum fjölgað mikið. „Það hafa verið gerðar sautján nýrnaígræðslur hjá Íslendingum á þessu ári og það er mesti fjöldi sem verið hefur frá upphafi. Á síðstliðnum áratug hafa þetta verið svona tíu til ellefu á ári en hefur aukist að þessu marki."

Runólfur segir enga eina skýringu á aukningunni.

„Það hefur verið aukning í öðrum löndum á liðnum árum og við kannski setið þar eitthvað á eftir. En oftast er um að ræða afleiðingar sykursýki, háþrýstiskemmda á nýru, nýrnabilun af völdum þeirra sem er svona algengasta orsök nýrnabilunar."

Stærstur hluti þeirra sem þurfa meðferð eru aldraðir.

„Fólk lifir lengur. Kemst í gegnum kannski aðra sjúkdóma, hjartasjúkdóma, sem lögðu fólk að velli áður en lifir lengur núna og nýrnasjúkdómur einn af fylgifiskum þess."

Þá segir Runólfur vaxandi fjölda innflytjenda hafa áhrif svo og þá staðreynd að þeir sem fengið hafa nýra koma oft aftur inn á biðlista þar sem ígrædd nýru endast aðeins í takmarkaðann tíma. Hann segir aukningu nýrnabilunar fela í sér meiri þörf fyrir líffæragjafa.

Það eru núna á bilinu 30 til 35 einstaklingar á einhverju stigi undirbúnings fyrir ígræðslu. Þannig að þessi vöxtur sem við höfum sé á þessu ári hann mun halda áfram. Eftirspurnin mun halda áfram að aukast."