Helmingur landsfundarfulltrúa styður Bjarna

Helmingur kjörinna landsfundarfulltrúa í skoðanakönnun Stöðvar 2 ætlar að kjósa Bjarna Benediktsson í embætti formanns Sjálfstæðisflokksins á sunnudaginn. Tæplega þrjátíu og sjö prósent ætla að styðja Hönnu Birnu en aðrir hafa ekki gert upp hug sinn eða neita að svara.

Stóra fréttamál helgarinnar er vafalaust formannskjörið hjá Sjálfstæðisflokknum en mikil spenna er í Laugardalshöllinni. Fréttastofa Stöðvar 2 og Vísis ákvað að gera skoðanakönnun meðal kjörinna landsfundarfulltrúa til að athuga hvern þeir vildu sjá sem næsta formann flokksins.

Um var að ræða óvísindalega könnun, en þetta er fyrsta könnunin sem birtist þar sem eingöngu kjörnir landsfundarfulltrúar taka þátt. Könnunin var leynileg og fengu þeir sem við ræddum við kjörseðil með nöfnum Bjarna og Hönnu Birnu. Þá hvöttum við fólk sem ekki vildi taka afstöðu til þeirra tveggja að skila auðu.

Hanna Birna með 36,5 prósent stuðning

Við töluðum við 52 landsfundarfulltrúa, eða 3,3 prósent kjörinna fulltrúa á landsfundinum. Við reyndum að tala við fulltrúa á breiðum aldri, unga sem aldna og fulltrúa af báðum kynjum.

Af 52 landsfundarfulltrúum ætla 26 að kjósa Bjarna Benediktsson en það er 50 prósent aðspurðra í könnuninni. Nítján merktu við nafn Hönnu Birnu Kristjánsdóttur, eða 36,5 prósent. Þá voru fjórir kjörseðlar auðir, eða 7,7 prósent og þrír neituðu að taka þátt, sem er 5,8 prósent.

Taka skal fram að könnunin er tekin degi eftir ræðu Bjarna Bendiktssonar við setningu landsfundarins. Báðir frambjóðendur eiga eftir að flytja sínar framboðsræður en það verður á morgun. Síðan verður gengið til atkvæða um hver verður næsti formaður Sjálfstæðisflokksins á sunnudag.

Niðurstaða í könnun Stöðvar 2 er nokkuð á skjön við niðurstöður í skoðanakönnunum meðal almennings og stuðningsmanna Sjálfstæðisflokksins en í þeim hefur Hanna Birna mælst með mun meiri stuðning en Bjarni. thorbjorn@stod2.is