Giggs tekur eitt ár til viðbótar hjá United

Ryan Giggs hefur skrifað undir nýjan eins árs samning við Manchester United.

Giggs hefur leikið allan sinn feril með United en hann er í dag 37 ára gamall.

Næsta tímabil verður númer 21 hjá Giggs í aðalliði United en hann lék sinn fyrsta leik með liðinu þann 2. mars árið 1991.

Hann á að baki meira en 850 leiki með félaginu og er leikjahæsti leikmaður í sögu þess. Hann er líka sá leikmaður sem hefur notið mestrar velgengni í sögu ensku úrvalsdeildarinnar.

„Það er frábært að vita að ég get enn lagt mitt af mörkum," sagði Giggs sem hefur þegar komið við sögu í 24 leikjum með United á tímabilinu.

„Það eina sem ég vildi gera var að spila með Manchester United og ég hef gert það í 20 ár. Það eru spennandi tímar fram undan enda margir góðir ungir leikmenn að koma upp."