Giffords getur staðið upp tveimur vikum eftir skotárásina

Bandaríski þingmaðurinn, Gabrielle Giffords, getur nú staðið upp tæplega tveimur vikum eftir að hafa verið skotin í höfuðið í bænum Tucson í Arizona.

Fjölskylda hennar vonar að hún geti farið í endurhæfingarmiðstöð í Houston á morgun en þar vinnur eiginmaður hennar sem geimfari.

Það er óljóst hvort að hún geti talað en hún varð fyrir heilaskemmdum við skotið. Hún er að minnsta kosti með sjón á öðru auganum því hún getur fylgt eftir hreyfingum með því.  Hitt augað á henni skaddaðist töluvert í skotárásinni og er óvíst hvernig því reiðir af.

Sex létust í skotárásinni en byssumaðurinn, Jared Loughner, er í gæsluvarðhaldi.