Notuðu sjúkrabíl í sjálfsmorðssprengjuárás

Að minnsta kosti tólf eru látnir og rúmlega 60 slasaðir eftir bílsprengjuárás í miðhluta Íraks í dag. Ódæðismennirnir notuðu sjúkrabíl sem þeir höfðu fyllt sprengiefni og óku honum á lögreglustöð þar sem hann sprakk í loft upp.

Þetta er önnur árásin á jafnmörgum dögum í landinu þar sem lögreglumenn eru skotmarkið. Í gær létust um 60 manns í borginni Tikrit, heimabæ Saddams Husseins, fyrrum leiðtoga landsins. Árásirnar voru báðar gerðar í Súnní þríhyrningnum svokallaða þar sem andspyrnumenn hafa enn sterk ítök.