Þyrlum sagt ofaukið á kæjanum í Sundahöfn

Framkvæmdastjóri ferðaskrifstofunnar Atlantik segir marga vilja lóð eins og þá sem sóst er eftir undir þyrlupall við lægi skemmtiferðaskipa í Sundahöfn. Hann tekur undir með hafnarstjórnnni. Engin eftirspurn sé eftir þyrluþjónustu þar.

„Ég fagna meiri fjölbreytni fyrir þessa ferðamenn en sé ekki að það sé nauðsynlegt að hafa þyrlupall við höfnina til þess að þjóna þeim,“ segir Gunnar Rafn Birgisson, framkvæmdastjóri ferðaskrifstofunnar Atlantik.

Eins og kom fram í Fréttablaðinu í síðustu viku synjaði stjórn Faxaflóahafna ósk Vesturflugs ehf. um að fá lóð undir þyrlupall við Skarfabakka. Fyrirtækið vill meðal annars þjóna farþegum skemmtiferðaskipa í Sundahöfn. Hjálmar Sveinsson, formaður stjórnar Faxaflóahafna, skýrði synjunina með því að skipafélögin hafi ekki sóst eftir slíkri þjónustu og að mikið umstang fylgi því að uppfylla öryggiskröfur vegna þyrluflugs til og frá staðnum.

Atlantik er umsvifamest eru í ferðaþjónustu við skemmtiferðaskipin sem koma til Reykjavíkur. Gunnar Rafn tekur undir með Hjálmari. „Það hefur komið fyrir að við höfum sent fólk í þyrluflug en það er mjög sjaldgæft að beðið sé um slíka þjónustu. Hún er mjög dýr og þessir farþegar eru ekki allir milljónamæringar heldur flest allir venjulegt fólk,“ segir hann.

Á hinn bóginn kveðst Gunnar Rafn vel skilja að Vesturflug hafi augastað á lóð nálægt skemmtiferðaskipunum og farþegum þeirra. Eflaust myndu þá fleiri nýta sé þyrluþjónustuna heldur en þegar hún sé í boði frá Reykjavíkurflugvelli. „Ég hugsa að það séu margir sem vildu gjarnan ná til þessa fólks. Sjálfur hefði ég til dæmis ekkert á móti því að fá úthlutað lóð þarna og geta verið með sölu á ferðum,“ segir hann.

Hluti vandans að sögn Gunnars er sem sagt takmarkað rými í Sundahöfn. Þyrluþjónusta þar gæti haft truflandi áhrif þegar tvö þúsund farþega skip leggi að bryggju.

„Þegar stór skip eru í höfninni er planið yfirfullt af stórum rútum og bílum. Þannig að ég held að það væri ekki til bóta að setja þyrlupall niður nákvæmlega þar. Plássið er takmarkað og það er kannski það sem höfnin er að horfa á í sambandi við þyrlupallinn; að það er ekki hægt að koma öllum þeim fyrir sem sína áhuga,“ segir Gunnar Rafn.

Vesturflug vonast enn til að fá lóðina í Sundahöfn, Talsmaður félagsins segiast ekki vilja tjá sig frekar um málið fyrr en að loknum fundi með fulltrúum Faxaflóahafnar í þessari viku. gar@frettabladid.is