Eiður Smári í byrjunarliðinu á móti Chelsea á morgun?

Enski fjölmiðlar telja það líklegt að Eiður Smári Guðjohnsen verði í fyrsta sinn í byrjunarliði Fulham þegar liðið fær Chelsea í heimsókn á Craven Cottage í ensku úrvalsdeildinni á morgun.

Eiður Smári spilaði sinn fyrsta leik með Fulham um síðustu helgi þegar hann kom inn á sem varamaður rétt fyrir leikslok í 2-2 jafntefli liðsins á móti Aston Villa.

Mark Hughes, stjóri Fulham, er víst mjög ánægður með frammistöðu Eiðs Smára á æfingum í vikunni og Hughes talaði líka um mikilvægi þess að Eiður kæmist í leikæfingu sem fyrst þegar Fulham fékk Eið á láni frá Stoke.

Fái Eiður Smári að byrja leikinn annað kvöld þá verður það fyrsti leikur hans í byrjunarliði síns félags síðan að hann var í byrjunarliði Tottenham á móti Sunderland í ensku úrvalsdeildinni 4. apríl í fyrra.