Skar höfuðið af eiginkonu sinni en fær að verja sig sjálfur

Fyrrverandi yfirmaður múslímskrar sjónvarpstöðvar í New York skar höfuðið af eiginkonu sinni. Dómari gaf honum í vikunni leyfi til að verja sig sjálfur í réttarhöldunum.

Maðurinn, Muzzamil Hassan, stofnaði, ásamt eiginkonu sinni, sjónvarpsstöðina Bridges TV. Stöðin átti að hjálpa málstað múslíma eftir atburðina 11 september og draga upp jákvæðari mynd af þeim.

Hjónabandserjur settu þó strik í reikninginn og þegar eiginkona Hassan fór fram á skilnað urðu deilurnar alvarlegri og fór að bera á morðhótunum. Saksóknarinn í málinu Elizabet DiPirro segir eiginkonuna, Aasiya Hassan, hafa viljað halda áfram í skilnaðarferlinu „...þrátt fyrir þann möguleika að soðið gæti upp úr."

Grundvöllur skilnaðarkröfunnar var fjöldi tilvika þar sem Aasiya hafði orðið fyrir ofbeldi, grimmri og ómannúðlegri meðferð. Á endanum stakk Muzzamil eiginkonu sína til bana og skar af henni höfuðið.

Það hefur svo vakið mikla athygli í Bandaríkjunum að Muzzamil fór fram á að verja sig sjálfur. Dómarinn féllst loks á kröfuna en Muzzamil hefur átt í deilum við lögfræðing sinn síðan réttarhöldin hófust.