Búist við að milljón manns mótmæli í Kaíró í dag

Búist er við að allt að milljón manns muni taka þátt í gífurlegum mótmælum sem boðað hefur verið til í Kairó í Egyptalandi í dag. Svipuð mótmæli eru boðuð í Alexandríu.

Her landsins hefur gefið út yfirlýsingu um að hann muni ekki reyna að hindra eða trufla mótmælin. Þá er einnig búið að boða til allsherjarverkfalls í landinu á morgun.

Dagar Hosni Mubaraks forseta virðast taldir í embætti en hann tilkynnti um breytingar í ríkisstjórn sinni í gær. Sú tilkynning breytti engu.

Fréttaskýrendur telja að þar sem herinn virðist ekki styðja við bakið á Mubarak sé ekkert annað í stöðunni fyrir hann en að láta af embætti.