Móðir Ellu Dísar að missa íbúð sína

Móðir langveikrar stúlku er niðurbrotin eftir að henni var tilkynnt að leigusali krefst þess að þær mæðgur verði bornar út af heimili þeirra á næstunni. Dóttir hennar, Ella Dís, er enn í þrýstiöndunarvél.

Um Ellu Dís hefur áður verið fjallað í fjölmiðlum. Hún er tæplega sex ára gömul en þegar hún var á öðru aldursári fór að bera á alvarlegum veikindum sem á endanum voru greind sem sjaldgæft sjálfsofnæmi, og þarf hún á mikilli aðhlynningu að halda.

Móðir hennar segir stöðuna erfiða og að nokkrum vikum liðnum muni hún verða heimilislaus. Þær mæðgur búa við Bjallavað í Norðlingaholti. Móðir Ellu Dísar hefur haft íbúðina á leigu á þriðja ár en hefur ekki getað staðið í skilum við Leiguliða ehf.

Ragna Erlendsdóttir hefur ítrekað leitað til yfirvalda á undanförnum mánuðum en segist hvergi hafa fengið lausn.

Í tilkynningunni sem Ragna fékk afhenta í gærkvöldi kemur fram að Leiguliðar ehf hafi rift leigusamningi við Rögnu og þess krafist að hún verði borin út. Krafan verður tekin fyrir í héraðsdómi Reykjavíkur á föstudag.

Ragna útilokar ekki að flytja til Englands þar sem hún hefur sterkara tengslanet.

Sjá viðtal við Rögnu í meðfylgjandi myndskeiði.