Hvenær eru skemmtistaðirnir opnir yfir hátíðarnar?

Það er að ýmsu að huga nú þegar jólin fara að ganga í garð. Á meðan sumir rembast við að finna jólagjafir handa vinum og vandamönnum eru aðrir að huga að því hvernig skreyta eigi jólatréð. Það eru þó einhverjir sem eru að velta fyrir sér hvernig skemmtanahaldið í miðborginni verður yfir hátíðarnar.

Lögreglan á höfuðborgarsvæðinu hefur nú tekið saman hvenær leyfilegt er að hafa bari í opna yfir hátíðarnar. Í tilkynningu frá lögreglunni segir að rétt sé að undirstrika að áfengisveitingar séu háðar tímamörkum í leyfum borgarstjórnar eða bæjarstjórna eftir því sem við á.  

SKEMMTANIR OG VEITINGAR UM JÓL OG ÁRAMÓT 2011

24. desember - Aðfangadagur: Allt skemmtanahald bannað frá klukkan 18:00

25. des - Jóladagur: Allt skemmtanahald bannað til klukkan 06:00 að morgni næsta dags (26.des.)

26. des - Annar í jólum: Skemmtanahald leyft samkvæmt skilyrðum leyfis aðfaranótt 27. desember en þó ekki lengur en til kl. 03:00 samanber málsmeðferðarreglur borgarráðs.

31. des - Gamlársdagur: Skemmtanahald leyft samkvæmt skilyrðum leyfis.

1. jan - Nýársdagur: Skemmtanahald leyft samkvæmt skilyrðum leyfis aðfaranótt 2. janúar en þó ekki lengur en til kl. 03:00 samanber málsmeðferðarreglur borgarráðs.

1. Heimilt er að hafa gisti- og veitingastaði opna allan sólarhringinn. Áfengisveitingar eru þó háðar tímamörkum í leyfum borgarstjórnar / bæjarstjórna. Skal stöðunum lokað þegar leyfðum veitingatíma áfengis lýkur og allir gestir farnir innan klukkustundar.

2. Heimilt er að opna staðina að nýju tveimur klukkustundum eftir að áfengisveitingum átti að ljúka. Veitingar áfengis mega samt ekki hefjast aftur fyrr en reglur sveitarstjórna kveða á um.

3. Lögreglan gerir ekki athugasemdir við lágværa tónlist eða flutning sjónvarpsefnis á veitingastöðum enda sé guðsþjónusta, kirkjuathöfn eða annað helgihald ekki truflað.

Ath. Samkvæmt 6. gr. málsmeðferðarreglna borgarráðs um veitingastaði og gististaði frá 17.07.2011 er þeim veitingastöðum í Reykjavík sem leyfi hafa til áfengisveitinga, heimilt að veita áfengi aðfaranætur 27. desember og 2. janúar sem um aðfaranætur laugardaga, sunnudaga eða almennra frídaga væri að ræða. Lengst má þó veita áfengi til kl. 03:00.