Bensínhækkanir furðulegar

Verð á bensíni og díeslolíu mun hækka um þrjár og hálfa krónu um áramótin verði frumvarp sem felur í sér hækkanir á gjöldum og sköttum samþykkt. Framkvæmdarstjóri FÍB segir hækkanirnar furðulegar þegar akstur hefur dregist saman og heimsmarkaðsverð er í hæstu hæðum.

Verð á bensíni og díselolíu hækkaði mikið á árinu en til dæmis var almennt verð á bensínlítranum um 212 krónur í upphafi árs en kostar í dag 228 krónur og hefur því hækkað um sjö og hálft prósent á árinu samanborið við rúmlega fimm prósent verðbólgu á sama tíma.

Dísel lítrinn hefur hækkað um þrettán prósent á árinu en algengt verð á honum er nú 242 krónur. Heimsmarkaðsverðs hækkanir útskýra hluta af þessarri hækkun en einnig hefur álagning olíufélaganna af díselolíu í desember verið um þremur krónum yfir meðalálagningu samkvæmt útreikningum Félags íslenskra bifreiðareigenda.

Samkvæmt frumvarpi um ráðstafanir í ríkisfjármálum er gert ráð fyrir enn frekari skattahækkunum á bensíni og olíu í gegnum hækkanir á kolefnisgjaldi, olíugjaldi á díselolíu og bensíngjaldi.

„Ef við tökum tillit til þess að það leggst síðan virðisaukaskattur ofan á þessar hækkanir þá er þetta um þrjár og hálf króna sem að bensín og dísel olía koma til með að hækka við þessar skattabreytingar," segir Runólfur Ólafsson framkvæmdastjóri FÍB.

„Við sjáum það að hefur verið samdráttur í umferð og svona skattur ofan á það háa heimsmarkaðsverð sem er, það er bara til þess eins að gera þetta enn erfiaðara sérstaklega fyrir fólk í dreifari byggðum að fara á milli staða. Þannig þetta er mjög furðulegt að vera að hækka gjöld hins opinbera á svona tímapunkti."

Frumvarpið verður afgreitt úr viðskipta og efnahagsnefnd til annarrar umræðu á morgun en gert er ráð fyrir að hækkanirnar taki gildi um áramótin.