Hvassaleitisskóli oftast hæstur

Skólar á Vestfjörðum stóðu sig hvað verst á samræmdum könnunarprófum í haust. Fellaskóli var með lægstu meðaltölin í flestum greinum en Hvassaleitisskóli er oftast hæstur.

Samræmd könnunarpróf eru þreytt í fjórða, sjöunda og tíunda bekk en einkunnir höfðu hingað til einungis verið gefnar út eftir sveitafélögum en nú hefur námsmatsstofnun birt meðaltöl einstakra skóla þar sem ellefu eða fleiri nemendur tóku prófin.

Einkunnirnar eru normaldreifðar þannig að meðaltal í hverri grein er alltaf þrjátíu. Skólar sem eru yfir þeirri einkunn eru þá yfir meðaltali en skólar sem eru með lægra en þrjátíu eru undir meðaltali. Samkvæmt niðurstöðum í tíunda bekk í íslensku og stærðfræði eru flest landssvæði með í kringum þrjátíu í einkunn. Vestfirðir skera sig þar hins vegar úr en þar voru skólarnir að meðaltali með 26. Þess ber þó að geta að einungis tveir skólar standa á bak við það meðaltal.

Þá er Fellaskóli í Reykjavík oftast neðstur eða í íslensku og stærðfræði í 4.bekk, og stærðfræði í tíundabekk. Enginn skóli er afgerandi efstur á lista en Hvassaleitisskóli er efstur bæði í íslensku í 7.bekk og ensku í tíunda bekk. Lægstu meðaleinkunn fær Auðarskóli í Búðardal en hann er með 16,8 í ensku í tíundabekk en fimmtán nemendur þreyttu prófið.

Þegar litið er einungis á niðurstöðu í stærðfræði og íslensku í tíundabekk er Flóaskóli efstur í íslensku, Grunnskóli Bláskógabyggðar í öðru sæti og Háteigsskóli í því þriðja. Í neðstu sætunum er hins vegar að finna Klébergsskóla með einkunnina 20,5 og því næst Fellaskóla og Tjarnarskóla með um 22. Efstur í stærðfræði er Álftamýrarskóli og þar á eftir koma Lindaskóli og Flóaskóli, allir með yfir 36 í meðaleinkunn. Lægstur í stærðfræði er eins og áður segir Fellaskóli en á eftir honum koma Grunnskólinn á Eskifirði og Auðarskóli í Búðardal.

Þess má geta að í minni bæjarfélögum eru oft fáir nemendur sem standa að baki hverri meðaleinkunn og því oft um miklar sveiflur að ræða á milli ára.