Lokað á Karen Millen eftir kápuleik

Lokað var fyrir Facebook-síðu Karen Millen á Íslandi fyrir um þremur dögum. Forsvarsmenn samfélagsnetsins segja ástæðuna vera kápuleikinn svokallaða, sem fór sennilega ekki framhjá mörgum notendum í lok síðasta mánaðar. Fyrirtækið fékk um 2.500 „like“ á síðuna sína á einum degi þegar leikurinn fór af stað.

Fréttablaðið greindi frá því í lok nóvember að leikir á Facebook þar sem notendur eiga að ýta á „like“, „kvitta“ á veggi og deila myndum frá fyrirtækjum til þess að vinna vörur eða þjónustu væru skýrt brot á notendareglum Facebook. Þau fyrirtæki sem setja slíka leiki í gang eiga á hættu að lokað verði fyrir síðurnar þeirra.

Hulda Ingvarsdóttir, framkvæmdastjóri Karen Millen á Íslandi, er enn í viðræðum við markaðsdeild Facebook og veit ekki fyrir víst hver staðan er. „Síðan er fryst,“ segir Hulda. „Við erum enn í viðræðum við Facebook og ég vona bara að þeir opni fyrir hana aftur. Mér finnst það frekar hart ef þeir ætla að gera okkur að fordæmi.“

Hulda þekkir dæmi þar sem síður hafa verið lokaðar í nokkra daga og svo opnaðar aftur. Hún segist nú vera að bíða eftir svari frá Facebook, en ef til þess komi að síðunni verði eytt endanlega muni hún bara opna aðra.

Smartland Mörtu Maríu á mbl.is stóð fyrir svipuðum leik og Karen Millen á dögunum. Þar stóð notendum til boða að „kvitta“ á vegg Smartlands á Facebook og þeir gætu þar með unnið „hrukkubana“ frá Lancome. Eins og áður sagði eru leikir sem þessir skýr brot á reglum Facebook og getur því Smartland átt von á því að lokað verði fyrir Facebook-síðu þess, þó að vissulega hafi hrukkubanaleikurinn ekki náð jafn mörgum „like“ og kápuleikur Karen Millen.- sv